لاس رسیدونکی لینک

Breaking News

بې نظير بوټو پر کور نظره بنده کړل شوه


دپاکستان پيپلز ګوند مشره ميرمن بوټو دجمعې په ورځ پر داسې حال کې پر پايه تخت اسلام اباد کې دخپل کور دننه نظربنده کړل شوه چې ټاکل شوې وه نوموړې به دپينډۍ په لياقت باغ کې دجمعې پر ورځ احتجاجي جلسې ته وينا کوي.
دپاکستان دريلوى وزير شيخ رشيد احمد وايي ميرمن بوټو پوليسو دامنيت له خاطره پخپله ولکه کې اخستې ده ولې چې پينډۍ ښار ته دترهه ګرو دننوتلو اطلاع ترلاسه شوې ده.
خو داسلام اباد يو مجسټريټ رانا اکبرحيات بيا وايي چې دميرمن بوټو تر يوې مياشتې پخپل کور دنظربندۍ امر دۀ ته ترلاسه شوى دى.
دپيپلز ګوند مشرې اعلان کړى ؤ چې دجمعې پر ورځ به دپينډۍ په لياقت باغ کې ددولت پر ضد ارو مرو احتجاجي جلسه کوي ولې دولت پيپلز ګوند ته دغلته دجلسې کولو اجازه نۀ وه ورکړې.
دپاکستان دمختلفو برخو څخه دجلسې لپاره لياقت باغ ته دپيپلز ګوند دکارمندانو دټوليدو دمخ نيوي پر غرض دجمعې پر سحر پينډۍ ښار ته غزيدلې ټولې لارې پوليسو، رينجرز او مليشې تړلې وې او هيچا ته يې اجازه ورنه کړه چې لياقت باغ ته لاړ شي.
لياقت باغ ته پرغزيدلو ټولو لويو لارو پر زرګونو پوليس ځايې پر ځايې کړل شوي وؤ.
او دغه پوليسو دلارو پر مينځ کې کنټينرونه او نور خنډان ودرولي وؤ چې له دې امله هي څوک دلياقت باغ پر لوري نۀ شول تللى پر اسلام اباد کې دبې نظير بوټو دکور مخې ته هم تر پينځوؤ سوؤ زيات پوليس ولاړ وؤ.
او کله چې ميرمن بوټو دجلسې لپاره لياقت باغ ته دتګ پر نيت دکوره رابهر شوه نو پوليسو ورته دتګ اجازه ورنه کړه دپيپلز ګوند معاون مشر مخدوم امين فهيم ويلي دي چې پوليسو دپيپلز ګوند دپينځوؤ زرو څخه زيات کارمندان او مشران نيولي دي او مونږ به ددې ګام پر ضد احتجاج ته دوام ورکوؤ.

XS
SM
MD
LG